1987an, herriko zenbait auzotako bizilagun talde bat elkartu egin zen, udal independente berri bat eratzea izanik euren helburua. Urte hartan bertan, udal hauteskundeetan, "Zierbena Unida" izeneko kandidatura batek zinegotzi bat sartu  zuen Abantoko Udalean.

1991ko martxoaren 24an, Zierbenako herritarrek segregazioari buruzko erreferendum batean hartu zuten parte, %91ko babesa emanez aukera horri. Hori ikusita, Aldundiak udalerri berria eratzeko neurriak artikulatu zituen. Neurri horiek Gernikako Batzar Nagusietan onartu ziren, eta 1993an indarrean sartu ziren. Hala ere, urte hartan bertan, otsailean, Abantoko Udalak errekurtso bat aurkeztu zuen EAEko Justizia Epaitegi Nagusian, eta epaitegiak bertan behera utzi zuen desanexioa, Estatuko Kontseiluaren derrigorrezko diktamen faltagatik.

Zenbait eztabaida politiko eta prozesu judizialen ostean, azkenik, 1994ko azaroaren 9an, Batzar Nagusiek Zierbenaren segregazioa onartu zuten, eta lehenengo udal hauteskundeak 1995eko urriaren 15ean egin ziren.

1995 hartatik, urtero-urtero, Zierbenak jaiegun bat gehiago dauka bere egutegian.